Boazobeatnagat

Kortesalmi (2008) mielde suopmelaš boazobeatnaga allodat lea 49-53 cm ja beana lea guhkes, juolgái ja falli. Boazobeana lea dábálaččat čáhppat dahje ruškat. Rattis, oaivvis ja julggiin leat vilges dielkkut. Seaibi lea dego báimmanbeatnagiin ja heailu viiddes geavllis. Nállašuhttima boađusin Suomas leat guokte boazobeananáli: suomasámebeana ja sámiboazobeana.

Beatnaga geavaheamis boazodoalus leat guhkes árbevierut, muhto mohtorgielká ja ealáhusa teknihkalašvuohta geahpedii boazobeatnaga geavaheami. Gielkká vehkiin bohccuid čohkkejit jođáneabbo beatnagiin beroškeahttá ja lassin árat gielkkáin ii lean báiki beatnaga fievrredeapmái. Beroštupmi boazobeatnagiidda lea goittotge loktanan ođđasit 1990-logus álggu rájes. Dálá beatnagat leat geavahusas juo govttolaš viidát erenoamážit davimus ja gaskkamus boazodoalloguovllus.

Govva: Tiina Pulska

Beatnaga ja olbmo oktasaš gaskavuohta ollá juo badjel 15 000 jagi geahčái boarrásut geađgeáigái. Goas beatnaga geavahišgohte veahkkin boazobargguin? Girjjálaš dieđut beatnaga geavaheamis eai leat seilon. V. J. Oinonen cealká Lapin yliperällä girjjistis čuovvovaččat:

“Go skuniheapme goddebivdin nohkagođii fuođđuid geahppáneami dihte sullii dálááigásaš boazodoallun, Sámi beatnagatge galge rievdadit luondduset. Bahávuođain bohcco fallehan meahcástanbeana galggai dás ovddos guvlui máššat láhttet bohccuiguin láđđát, goittotge váruhit massimis árvoválddi bohccuid čalmmiin. Beatnagis dáhpáhuvvan rievdadus lea sápmelaččaid ráhkadus. Vearrámus bohccuid ruohtaheaddjit ja julggiide gáskit duššaduvvojedje ja seamma vuorbbi ožžo dimislunddot beatnagat, maid bohccot eai gudnejahttán. Dáid ravddamusaid gaskii báhcán beatnagiin skuvlejuvvojedje badjeolbmuid bargoskihpárat.”