Heargegilvvohallansánit

Njoarosteapmi

Suohpan lea boazodoalu árbevirolaš bargoneavvu. Njoarostangilvvus galgá bohccuid sajis njoarostit stoalppuid, mat leat iešguđet mátkki duohken. Ulbmilin lea fáhtet nu jođánit go vejolaš iežas luotta stoalppuid, oaneheamos gaskkas guhkimussii. Nissoniid njoarostanmátki lea 7-11 mehtera ja almmáiolbmuid 11-15 mehtera. Mánáide leat iežaset luohkát. Gilvvus lea dábálaččat 6-10 minuhta áigeráddjehus ja jođánamosit luotta njoarostan njoarosteaddji vuoitá. Buoremus njoarosteaddjit njoarostit luotta juoba minuhtas.

Rátkinvuodjin

Rátkinvuodjimis gilvoheargegeahččaleaddjit geahččalit beassat kilomehtera oktagasvuodjimis áiggi 1:25 (1 min 25 sek) vuollái. Juos besset dan áiggi vuollái, dat ožžot gilvohearggi stáhtusa ja sáhttet oassálastit virggálaš heargegilvvuide. Rátkinvuodjima gohccá virggálaš gohcci.

Almmolaš luohkká

Gilvoheargi lea olahan rátkinvuodjimis kilomehteris áiggi 1:25 ja heargi lea registrerejuvvon Bálgosiid ovttastusa bajásdoallan gilvoheargeregisterii gilvvohallanbilttáin. Heargi gilvvohallá almmolaš luohkás dassážii go časká báhkka luohká áiggi.

Báhkka luohkká

Go gilvoheargi časká kilomehteris áiggi 1:19, dat beassá báhkka luohkkái. Báhkka luohkás gilvvohalletge buot falimus hearggit.

Boazu Cup -oassegilvvut

Heargegilvováljagotti dohkkehan ja gohccán heargegilvvut leat almmolaš heargegilvvut ja dain eanemustá vihtta leat jahkásaš Boazu Cup -gilvvohallanáigodaga oassegilvvut. Oassegilvvuid ordnejit báikkálaš searvvit. Boazu Cup -oassegilvvuin čuoggáid eanemus čoaggán heargi lea Cup-meašttir. Suoma beale herggiid gilvvohallanáigodat nohká Heargegonagasgilvvuide, main gonagasvuođas gilvvohallet 24 eanemus Cup-čuoggáid čoaggán báhkka luohká hearggi.

Sprinta

Sprintagilvvohallamat ordnejuvvojit 201,12 mehtera guhkkosaš luottas. Sprinttat lea bivnnuhis gávpotdáhpáhusat. Daid ordnejit jahkásaččat earret eará Roavvenjárggas, Anáris ja Norgga Mázes.

Gollebiellovuojut

Nissoniid luohká Gollebiellovuojut leat jahkásaččat oassin Poro Cupis. Vuosttaš Gollebiellovuojut ledje jagis 1976. Bálkkašupmin lea árbevirolaččat gollebiellu.