Proojeekttoimâm

Kiävtustân láá kyehti kuávdáá proojeektruttâdem kanava puásuituálu ovdedem várás.

Vuosmuš lii EU toohâm máhulâžžân ovdedemproojeekttoimâm, moos  uuccâp táválávt EJB-kuávdáá peht ruttâdem. Täid ruttâdemkäldeid lii tubdum iivij mield EU ráhtusruttârááijun, nuuvtko eennâmtuálu stivrim- já toorjâruttârááijun, sosiaallâšruttârááijun, kuávluovdedemruttârááijun já Euroop tálulâškuávlu ovdedemruttârááijun. Almugijkoskâsiih projekteh láá vuod Interreg-, TACIS- já Kolarctic-ohjelmeh.

Nubbe ruttâdemkanava lii eennâm- já vyevdituáluministeriö Eennâmtuálu ovdedemruttârááju. Taah projekteh láá iäláttâsân lahtâseijee čielgâdâsah já tutkâmeh.

 

Puásuiiäláttâs lii kiävttám puoh mainâšum ruttâráájuid 2000-lovvoost. Tyehin lii kuttlov ovtâstus išedâm olášuttum EU-uásiruttâdem ovdedemprojektid, muádlov Eennâmtuálu ovdedemruttârááju ruttâdâm tutkâmproojeekt já muádlov eres ruttârááju iišijn olášuttum proojeekt.

Proojeekttoimâ aalgij  ihetuhháát molsom ääigi kuulmâ uáivilinjá peht. Taah lijjii poccuupiärgu smavâsovdedem, puásuitálumađhâšem já teknologia. Taan ääigi Palgâsij ovtâstus proojeektkárttáást láá 12 linjád, ko ovdiibeln mainâšumij lasseen proojeekttooimâ kuávdážân lii luptum škovlim, kvaliteet, lasepiämmâm, almugijkoskâsâš ovtâspargo, markkânistem, puásuituállei pargopyereestpiergim, piäđui, puásuipaartijd já eennâmkevttim.

Ruávis arvâlusâi mield projektij häämist puásuituálu oovdedmân kevttum ruttâmeeri lii mestâ 10 miljovn eurod. Proojeektvaarij iišijn láá puáhtám iskâđ, ovdediđ já škovliđ – vâi piso ovdánmist mieldi.