Čäcivyeimi

Lokka já Porttipahta tahojaavrij vuálá paccii vijđes kuáttumenâmeh iivijn 1967 já 1970. Enâmij kevttimân hárjánâm poccuuh vuolgii jotteeh. Taid viežžii iivij ääigi joba čuođij kilomeetterij keččin. Poccuuh vyejâdii tahojaavrijd lavŋepuárreid já hevvânii. Tahojäävrih nubástuttii mietimái kuávlu pirrâs, kulttuur já sosiaallii rááhtus. Njuolgâdis ekonomâlâš monâttâsah lijjii viijđes, iäge sajanmáávsuid monâttâsâin lah kuássin ášálávt huolâttâm. Ihepoojij mield kuávlu iäláttâsah lii hárjánâm tilálâšvuotân páágu oovdâst, mut tahojaavrij rähtim kuođij páihálijd ulmuid elimân pisovâš uddoid.

Vijđes feerejum tahojävrivahâgijn huolâhánnáá puásuituálukuávlu savâstitteh távjá puáđđumjäävrih Kollaja já Kemihaara (oovdiš Vuotos). Kuohtuin tahojaavrijn liččii pisovis, vijđes já merhâšittees vaahâglâš pirâsvaikuttâsah. Kollaja puáđđumääldis vađâččii kuoškâisuojâlemlaavâ lehâstem. Kemihaara áldá vuálá pásáččii ennuv Natura-kuávluh.

Kollaja äldisvuávám lii Pudasjärvist, Kollaja palgâs enâmijn. Kemihaara ääldis vuod Hirvasniemi palgâs enâmijn Pelkosenniemist. Áldái vuálá päccee enâmij merhâšume puásuituálun lii styeres, enâmijn lii poccuid rávhálâšvuođâ. Áldáh tuálvuččii palgâsijd kuávdáš kesikuáttum- já kyeddimenâmijd já sehhiiččii puohrâkkân enâmij kuáttumvarriistâllâm. Hirvasniemi paalgâs puávtáččij Kemihaara áldá tiet juáhásiđ kyevti uásán, já talle kuávlu puásuituálu kolgâččij orniđ puohrâkkân uđđâsist.

Veikkâ äldisvuáváámeh láá uáiviääšist Hirvasniemi já Kollaja palgâsij kuávluin, vaikuttâsah oláččii meid ránnjápalgâsáid. Puásuituálun vaigutteijee táváliih vaikuttâsah liččii: puásuituálu estum, puásuituálupargoi šoddâm váddásubbon, pargoh lasaneh já puásuituálust kevttum kiddiist omâdâhân kyeskee vahâgeh. Kuáttumenâmij monâttâsah tovâttiččii puásuimeerij njeeijâm. Lasseen áldái stuorrâ čässuáivi tääsi molsâšuddâm porgâččii jieŋâin ervidmettum jotteeh nuuvt poccuid ko pajeulmuid. Meiddei jotolâh lasaniččii kuávlust já tovâttiččii luhottesvuođâid.

Puásuituálu uáinust äldisprojektijn láá maaŋgah negatiivliih vaikuttâsah, iäge taid tovâttâm ekonomâlâš monâttâsâid iäláttâsân pyevti hilgođ. Puásuituálu vyestilist kuohtuid äldisprojektijd. Projekteh láá meid vyeimist leijee lahâasâttem vuástá.