Toimâjuurdâ

Palgâsij ovtâstus lii maaŋgâpiälálii já olluv tääsi máátu äššitobdeeservi. Tot tuáimá puásuituálu ovdedem pälgisčyelleen já aktiivlâžžân vaigutteijen sehe Suomâst já olgoenâmijn. Palgâsijd ovtâstus oovded sierâ intresspeelij pehtilis vuáruvaikuttâs já pyere ovtâspargo. Ovtâstus parga aktiivlávt puásuituálu ekonomâlâš já kulttuurlii eellimvyeimi peeleest. Ovtâstus tooimâ stivrejeh ávusvuođâ, njyebžilvuođa já pehtilvuođâ vuáđujurduuh. Pargojuávkku lii čonâdâttâm pargosis já sist lii motivaatio toos já hovdim lii pyeri.

Puásuituálu ávhástâl tavekuávlui luánduriggoduvâi rehelávt nanaguoddevaš ovdánem vuáđujurdui mield já kunnijât puáttei puolvâi rievtijd. Ekologâlâš robdâiävtuh rähtih puásuituálu ekonomâlâš, sosiaallii já kulttuurlâš tooimâ vuáđu. Lahâasâttem já ohtsâškodelâš miärádâsâi toohâm asâtteh puásuituálu toimâmáhđulâšvuođáid raamijd. Puásuituálu lii tavekuávlu iäláttâsâin puárásumos já nanosumos. Tave siijdâin puásuituálu merhâšume luptân puátteevuođâst ain eenâb, ko eres pargoh, om. eennâm- já vyevdituálu falâlduvah kiäppáneh. Puásuituálu áánsust Tave-Suomâ siijdah láá assum já eellimtoháliih.

Poccuupiärgu já eres puásuipuohtuuh láá ovdâsvástádâslávt puovtâdum, torvolijd já ollâkvaliteetlijd. Puásuituálu kunnijât elleid já luándu. Siärváduvâin já eres ulmuiguin puásuituálleeh tuállejeh pyeri savâstâllâmohtâvuođâid já máhđulijd ruossâlâšvuođâid viggeh čuávdiđ šiev tiileest. Tooimâ oovtmanolâš ovdedem tuárjoo kannattemvuođa já kompetens iäláttâstooimâst.

Ellee sämmilâš já syemmilâš puásuikulttuureh jiešvuođâiguin, legendaiguin, mainâsijguin já persovnijguin pyehtih imagoäävhi ubâ Suomân já eromâšávt Tave-Suomân. Puásuipiämmukulttuur já poccuupiärgu kuulmâin EU nommâsyejimerhâinis láá Suomâ aalmuglii piämmukulttuur šeellâdumoseh tääsnih. Puásui lii maaŋgâpiälálâšvuođâinis ohtâ tergâdumos tahhein Tave-Suomâ mađhâšem kiäsuttemvuoimijn. Puásuituálu váldá uásis siärvádâhovdâsvástádâsâst ko tuállee aalmuglii kriisâääigi huolâttâstorvolâšvuođâ. Palgâsij ovtâstus lii Rijjâtátulâš kááijumpalvâlus VAPEPA jeessânservin já puásuiulmuuh páihálii meccitubdâmuš äššitobden uásálisteh táárbu mield jieškote-uvlágán kááijumtoimáid kuávlustis. Pajeulmuuh láá aktiivlâš vaigutteijeeh páihálávt já tuállejeh torvolâšvuođâ já kollektivlâšvuođâ tavekuávlu siijdâin.