Gilvinsuodjeáidi

Gilvimiid áidun sáhttá leat dárbbašlaš, juos geavahusas ii leat eará vuohki doalahit bohccuid eret gilvimiin. Áidungoasttádusat galget goittotge leat govttolaččat goris vejolaš vahágiidda. Áidumis ráđđádallojuvvo ja sohppojuvvo áššáiosolaččaid gaskkas. Juos áidumis eai beasa áddejupmái, sáhttá ášši čoavdima várás gohččut čoahkkái boazovahátlávdegoddi.

Diggi meroštallan heivvolaš áidunhuksenvuogi mielde áidi lea dahkkon mehterallosaš áidefierpmis (23.6.2004, 04/627). Stoalpun geavahuvvo áisejuvvon guossa- dahje beahcestoalpput.

Áidumii dárbbašuvvo álo eanaeaiggáda lohpi. Juos eanaeaiggát gieldá áiddi huksema iežas eatnamii, ii bálgosa dárbbaš jáhkehahtti buhttet bohccuid dagahan vahágiid (Roavvenjárgga hoavvarievtti mearrádus 6.9.2006 /756). Buhttengeatnegasvuohta ii vealttakeahttá šatta, juos vahátgilládeaddji veahkeha doaimmainis vahága šaddamii. Eanaeaiggáda dahje hálddašeaddji fuolahangeatnegasvuhtii ja vahágiid eastadeapmái gullá earret eará doallat áiddiid vearráhiid gokčojuvvon, amaset bohccot beassat eatnamii, gos dat eai oaččo leat.

Áidumis dahkkojuvvo álo čálalaš soahpamuš bálgosa ja eanaeaiggáda gaskkal. Maiddái áiddi fuolaheamis galgá soahpadit oassebeliid gaskkas čálalaččat. Bálgosat sáhttet ohcat Lappi EJB-guovddážis boazodoalu ja luondduealáhusaid ruhtadanlága (POLURA 896/2011) mielde áidunveahki suodjeáiddi huksengoluide.

Gilvinsuodjeáiddit leat bálgosa opmodat. Áiddiid vahágahtti lea vahátbuhttengeatnegasvuođas vahágiin.