Bieggafápmu
Bieggafápmorusttegiid váikkuhusa bohccuide ja boazodollui eai vel mis Suomas jur dovdda. Olosa bieggarusttegat lea turismaguovddážis Muonás ja Eanodaga Lammasoaivvis leat dušše golbma unna fápmorusttega. Tervola Varevaara fápmorusttegat leat áibbas njelješgeainnu guoras, nugo maid Simo fápmorusttegat. Máŋggat bieggafápmorusttetprošeavttat leat goittotgo jođus birra boazodoalloguovllu ja lagasjagiin oažžut lasi vásáhusaid bohccuid reageremis fápmorusttegiidda.
Ruoŧas dahkkon GPS-čuovvundutkamušat ja bohccuid baikadutkamušat addet juo čujuhusaid bohccuid reageremis. Bohccot geahččalit garvit bieggafápmorusttetguovlluid sihke rusttegiid huksedettiin ja daid doaibmama áigge ja leat erenoamážit guoddináigge hearkkit hehttehusaide. Bohccuid láhttemii váikkuhit goittotge máŋggat dahkkit, dego guovllu eará infrastruktuvra dahje hehttehus, guohtuneanantiipa ja buhttejeaddji guohtuneatnamiid leahkin.
Erenoamážit geasseguohtuneatnamiid, guoddinguovlluid, geavaheapmi ja bohccuid johtolagat sáhttet rievdat bieggafápmorusttegiid dihte. Fápmorusttegiid sajušteapmi gaskavuođas guohtuneatnamiidda ja daid geavahussii lea guovddáš sajádagas go árvvoštallat fápmorusttegiid váikkuhusaid. Bieggafápmorusttetprošeavttaid galgáge geahččat álo ovttaskas dáhpáhussan. Prošeaktaplánema álgomuttuid rájes galgá čielggadit, makkár váikkuhusat vejolaččat leat ja sáhttágo daid plánemiin geahpedit. Bohccuid GPS-čuvvon ovdal prošeavtta, huksedettiin ja fápmorusttegiid geavahusa áigge boahtá lagasboahttevuođas lasihit mearkkašahtti ollu dieđu bohccuid reageremis ja guohtuneatnamiid geavahusa nuppástumiin
Jagi 2014 loahpas Suomas ledje doaimmas 230 bieggafápmorusttega, maid ollislaš kapasitehta lea 627 MW. Dat buvttadedje sullii 1,3 proseanta Suomas jagis 2014 geavahuvvon šleađggas (Suoma bieggafápmorusttetovttastus rs). Bieggafápmorusttegat leat oassi bargo- ja ealáhusministeriija guhkes áigegaskka dálkkádat- ja energiijastrategiija. Dan ulbmilin lea loktet bieggafápmorusttega ollislaš kapasitehta 2500 megawattii jahkái 2020 rádjái.
Buot boazodoalloguovllus plánejuvvon bieggafápmoprošeavttat eai gáibit birasváikkuhusaid árvvoštallama. Unnit mihttolávva prošeavttaid geahččalit ollašuhttit dušše lávvaráhkademiin. Váikkuhusat boazodollui galgá goittotge álo árvvoštallat ja vuhtiiváldit prošeaktaplána álgomuttuid rájes. Boazodoalu ja luonddu geahččanguovllus unnimusat hehtte bieggafámu sajáidahttin juo ovddalgihtii huksejuvvon guvlui.
