Eanangeavaheapmi boazodoalloguovllus

Boazu lea smirezasti, mii dárbbaša máŋggalágan borramuššattuid jahkejohtimisttis sierra muttuin. Boazodoallu vuođđuduvvá luonddu guohtuneatnamiidda ja bohcco friddja guođoheapmái dain: boazu ohcá ja gávdná borramušas ieš luonddus, boazu ávkkástallá sullii 350 sierra borramuššattu. Mearkkašahtti oassi bohcco borramuššattuin, erenoamážit jeagil, šaddá mehciin. Bohccuid geasseguohtoneatnamat leat jeakkit, giettit ja šattolaš ájaguorat. Čakčat bohccot čohkiidit vuvddiide borrat guobbariid.

Boazodoallu dárbbaša viiddes ja máŋggabealat guohtuneatnamiid vai dat sáhttá doaibmat ekologalaččat, sosiálalaččat, kultuvrralaččat ja ekonomalaččat heivvolaš vugiin.

Geasseguolggat bohccot Suoločielggi filttiin geasset 2013

Eará eanangeavaheapmi váikkuha boazodollui earret eará borramušresurssaid dahje guohtuneatnamiid uhccuma ja cuovkaneami, bohccuid guohtunjohtima hehttehusaid ja nuppástumiid, boazodoalu doaimma hehttema ja sierralágan lihkuhisvuođaid lassáneami hámis. Eanangeavaheamis eai leat čuovvumušat dušše boazodoalloservodaga ekonomalaš doaibmaeavttuide, muhto maiddái kultuvrii.

Boazodoallu lea sorjavaš luonddus ja vuođđuduvvá ođasmuvvi luondduriggodagaid nanaguoddevaš ávkkástallamis. Boazodoalu eavttuide váikkuheaddji eanageavaheami hámit leat prinsihpas buot boazodoalloguovllu luondduriggodagaid ávkkástallamii guoskevaš doaimmat. Guovddáš váikkuheaddjit leat vuovdedoallu, ruvkedoaibma, biegga- ja čáhcefápmu, lavdnjebuvttadeapmi, turisma ja sierralágan suodjalanguovllut.

Poronhoitoalueen maankäyttökartta 2021

Buoremus guohtuneana lea doarvái viiddis, oktilaš ja máŋggabealat. Boazu gávdná doppe sierralágan borramuššattuid ja čiegarda juohke siivvus. Buorre guohtuneatnamis boazu oažžu doarvái borramuša ja doppe lea guohtunráfi massiivvalaš olbmodoaibmama haga. Bohccuid buoremus guohtuneatnamat leat suodjalanguovlluin, gos eará eanageavaheami leat rádjen. Boazodoallu lea aktiivvalaččat oasálažžan sierralágan lágas mearriduvvon eanangeavaheami meannudemiin, dego lávvaráhkadeami eará dásiin (eanagoddilávvaráhkadeapmi, oppalaš lávvaráhkadeapmi, sadjelávvaráhkadeapmi), prošeavttaid birasváikkuhusaid árvvoštallamis, suodjalusguovlluid dikšun- ja geavahanplánain, málmmaohcan- ja ruvkelohpeproseassain ja johtolaga plánemis (geaidnu- ja luoddaplánat).

Bálgosiid ovttastus doaibmá boazodoallojearaldagaid áššedovdin ja áššáiosolaš bálgosiid veahkkin sierra eanageavaheami meannudeamis, addá cealkámušaid ja oassálastá ráđđádallamiidda, stivrenjoavkkuide ja ovdánahttinbargojoavkkuide ja čoaggá dieđuid sierralágan eanangeavaheamihámiid váikkuhusas boazodollui.

Boazodoallolága 53 § mielde stáhta eatnamiid guoskevaš, boazodollui čielgasit váikkuheaddji doaibmabijuid plánedettiin galgá álo ráđđádallat áššáiosolaš bálgosa ovddasteddjiiguin. Ráđđádallamiin bálgosa ovddasta boazoisit.

 

 

 

PoroYVA

PoroYVA-ofelaš  (suomagillii) lea ollislaš diehtogáldu boazodoalu vuhtiiváldimis eanageavahanprošeavttain.

Boazodoalu báikediehtomateriálat

Boazodoalu báikediehtomateriálat leat čoggojuvvon 2000-logu álggus ovttasbarggus bálgosiiguin.