Tuåimmjuurd

Paalǥâskooʹddi õhttõs lij määŋgpeällsaž da õlltääʹzz silttummuž äʹšštobddiorganisaatio. Tõt tuåimmai puäʒʒtääl ooudâsviikkmõõžž ooudâstjooʹttjen da aktiivlaž vaikkteeʹjen nuʹtt dommjânnmest ko meeraikõõsǩeld. Paalǥâskooʹddi õhttõs oouʹdad jeeʹres intreʹssbieʹli viõkkšõs vuârrvaikktummuž da õhttsažtuâj. Õhttõs reâugg aktiivlânji puäʒʒhååid tällõõzzlaž da kulttuurlaž jieʹllemviõkkvuõđ peäʹlest. Õhttõõzz tuåimmjummuž ohjjee äävʼvuõđ, soojjlõsvuõđ da viõkkšõsvuõđ vuâđđjurddi. Tuâjjlažkåʹdd lij samai motivõsttum da tuâjjses čõnnõõttâm da jååʹđtummuš lij šiõǥǥ.

Puäʒʒhåidd äuʹǩǩad tââʹv vuuʹdi luâttreeʹǧǧesvuõđid tuõđi ǩeâllʼjeei ouddnummuž vuâđđjurddjivuiʹm, puõʹtti sokkpuõlvvõõǥǥi vuõiggâdvuõđid ciʹsttjeeʹl. Ekolooglaž uuʹccmõsõõlǥtõõzz räʹjje puäʒʒhååid tällõõzzlaž, sosiaalʼlaž da kulttuurlaž tuåimmjummuž vuâđ. Lääʹjjšiõttummuš da õhttsažkååddlaž tuʹmmjemtuâjj piʹjje puäʒʒhååid tuåimmjemvuäittmõõžžid raamid. Puäʒʒhåidd lij tââʹv jieʹllemvuõʹjjin puärrsumõs da sääuʹrmõs. Tââʹv siidin puäʒʒhååid miârkteeivuõtt šorran puõʹttivuõđâst pâi jäänab, ko jeeʹres mâʹte mädd- da meäʹcctääl taʹrjjääm tuâj pâi ǩeäppne. Puäʒʒhååid diõtt oummu jälste Tâʹvv-Lääʹddjânnam siidin puõʹttivuõđâst še. Puõccu vueʹǯǯ da jeeʹres puäʒʒouddaz lie vasttõsvuõđlânji puuʹtʼtum, staanâs da kvaliittla. Puäʒʒhååid harjjtet jieʹllʼjid da luâđ ciʹsttjeeʹl. Jeeʹres õhttsažkååʹdd da oummivuiʹm tuõʹllʼjet šiõǥǥ saǥstõõllâmõhttvuõđ da vueiʹtlvaž risttreeidaid põõrǥât räʹtǩǩeed šiõǥǥ jiõggâst. Tuåimmjummuž juätkkjeei ooudâsviikkmõš tuärjjad kannteei da ǩeâšttõõttâmpâstlvaž jieʹllemvueʹǩǩtuåimmjummuž.

Jieʹllemviõkksa säʹmmlaž da läʹddlaž puäʒʒkulttuur vooudlaž jiiʹjjesnallšemvuõđeezvuiʹm, legendaaʹjeezvuiʹm, šuuʹtǩeezvuiʹm da persooneezvuiʹm puʹhtte samai jiânnai imagoääuʹǩ obb Lääʹddjânnma da jeäʹrben Tâʹvv-Lääʹddjânnma. Puäʒʒveärrkulttuur da puõccu vueʹǯǯ koolmin EU nõmmsuõjjmiârkeesvuiʹm tuåimmje Lääʹddjânnam meerlaž veärrkulttuur čuõvvumus täʹsnnen. Puäʒʒ lij määŋgpeällsažvuõđines õhtt kõskksumõs Tâʹvv-Lääʹddjânnam maatkčummuž ǩieʹssemviõkktuejjeeʹjin.

Puäʒʒhåidd kuâdd vueʹzzes õhttsažkåʹddvasttõõzzâst še tuõʹllʼjeeʹl meerlaž kriispoodd jeäʹltemsnäätnaivuõđ. Paalǥâskooʹddi õhttõs tuåimmai Jiõččtäättlaž peälštemkääzzkõõzz (VAPEPA) vuäzzlažorganisaation da puäʒʒhoiʹddjeei vuässâʹtte taarbšeʹmmen pääiklaž jânnamtobddmõõžž ämmatneʹǩǩen jeeʹresnallšem peälštemtuåimid vuuʹdines. Puäʒʒhoiʹddjeei tuåimmje aktiivlaž vaikkteeʹjen pääiklanji da tuõʹllʼje staanvuõđ da õhttsallâšvuõđ tââʹv siidin.