Paalǥâskooʹddi õhttõs
Paalǥâskooʹddi õhttõs lij puäʒʒtääl vuäʹpstem-, raʹvvjem- da äʹšštobddiorganisaatio.
Paalǥâskooʹddi õhttõõzz tuâjjan lij puäʒʒhåiddlääʹjj (848/1990) mieʹldd:
1) tuåimmjed paalǥâskooʹddi õʹhtte čõõnnʼjen;
2) ooudâsviikkâd puäʒʒhååid da puäʒʒtääl;
3) oouʹdeed puäʒʒhååid tuʹtǩǩummuž, puäʒʒhååid kuõskki teʹstt-tuåimmjummuž da puäʒʒšõõǥǥtummuž da -valmštummuž; di
4) spraavâd jeeʹres tõõzz šiõttuum leʹbe mieʹrruum tuâjaid (PHL 20.1 §).
Paalǥâskooʹddi õhttõs:
- Vuäʹppast paalǥâskooʹddid, puäʒʒvuäʹmsteeʹjid, čõõnâsjooukid da meerlaid puõccuid õhttneei kõõččmõõžžin
- Õlmstââʹtt Poromies-lõõstda jeeʹres puäʒʒhååid teâttmateriaal
- Reäšš saǥstõõllâm-, teâđtem- da škoouʹlʼjempooddid
- Rääjj puäʒʒhååid da puäʒʒtääl ooudâsviikkâm diõtt aalǥtõõzzid lääʹjjšiõttummuž da vaaldâšm vuuʹdest
- Oouʹdad paalǥâskooʹddi õhttsažtuåimmjummuž
- Vaikkat puäʒʒtallu õhttneei jeeʹres jieʹllemvuõʹjjid da čõõnâsjooukid puäʒʒhååid tuåimmjemoudldõõzzi seeiltem diõtt
- Tuärjjad puäʒʒhååid tuʹtǩǩeemtuåimmjummuž da tuõʹllai Kutuharju teʹsttpuäʒʒkarddâz
- Vaʹsttad väʹlddkooʹddi kõskksaž raajjpuäʒʒcõggâmääidain
- Tuåimmai veʹrǧǧneʹǩǩen peʹlljmiârkkaaʹššin
Paalǥâskooʹddi õhttõõzz vuäzzla lie lääʹjjmeâldlânji puk paalǥâskååʹdd.
Paalǥâskååʹdd âʹnne tuʹmmjemvääʹldes õhttõõzz såbbrest. (PHL 20.2 §) Õhttõõzz halltõs da eʹtǩǩeeisååbbar priʹmme juõʹǩǩ eeʹjj tuåimmjemplaan da tällõsarvvlõõzz, koin puäʹtte ouʹdde Paalǥâskooʹddi õhttõõzz tuâj. Paalǥâskooʹddi õhttõõzz väʹlddveärlaž takai såbbar leʹbe Puäʒʒparlameeʹnt tuõʹllʼjet õhttân vuâra eeʹjjest ǩieʹssmannu aalǥâst.
Paalǥâskooʹddi õhttõõzz puåđõsohjjummšest vaʹsttad Lappi jieʹllemvueʹǩǩ-, jååttlõk- da pirrõskõõskõs. Juõʹǩǩ eeʹjj rajjum puåđõs-suåppmõõžžâst meäʹrtõõlât õhttõõzz tääʹrǩab tuâjaid.