Peʹlljmiârk

Puõccu vuäʹmstet da juõʹǩǩ puõccu peeʹlljid mieʹrǩǩeet suu vuäʹmsteeja rekisterõsttum veerǥlaž peʹlljmiârkid. Paalǥâskooʹddi õhttõs tuõʹllai peʹlljmiârkkrekisteeʹr da tuåimmai veʹrǧǧneʹǩǩen peʹlljmiârkkaaʹššin (PHL 848/1990).

Peʹlljmiârki snaaidid kovveet nuʹtt pirstõõzzivuiʹm ko saaʹnivuiʹm. Juõʹǩǩ peʹlljmiârkk lij jiiʹjjesnallšem kuällas jeeʹresnallšem snaaidid. Peʹlljmiârk lookkmõõžž altteet puõccu vuäʹljspeeʹlljest, peeʹllj ǩieʹjjest maddja årra jååʹđeeʹl. Ââʹnnmest åårrai miârk lie nuʹtt 12 000.

Peʹlljmiârki snaaid lie: čälstõk, cieʹǩǩes, haŋgg, rââst, kuepper/sueʹrr, luõʹddstõk, âʹlnn veeʹnn, vueʹlnn veeʹnn, čokkum peʹllj, kuʹǩes čälstõk, vueʹstthaŋgg, reäiʹǧǧ da reäiʹjest kuvddân, lååʹddkõʒʒ, tiill, pueʹrdeshaŋgg, haŋgg da haaŋgâst sizz di jõnn cieʹǩǩes. Snaaidid õhtteeʹl vuäǯǯat jeeʹresnallšem peʹlljmiârkid. Lââʹssen vueiʹtet ââʹnned Paalǥâskooʹddi õhttõõzz priimmâm lââʹssmiârk, leʹbe piiltâǩ.

Lââʹssteâđ peʹlljmiârkin da miârkkrekisteeʹrest: jottâz piisar