Lâuʹŋŋpuuʹtʼtõs

Jieʹǧǧ lie kõskksaž puõccui palggâmjânnam da kueʹddemvuuʹd. Vâʹlljporrmõõžžlaž jieʹǧǧin lie jiânnai porrmõõžž. Äävas da piõggi vuʹvdden tõk maazzlâʹstte puõccuid ooccâd suõj čuõškin. Lâuʹŋŋpuuʹtʼtemvuuʹdid kuäivat takainalla čiŋŋâl, ceäggruõbddsaž vuäjid, kooi čääʹʒʒvueiʹvv kaggââtt õllʼjõʹsse. Vuäjin raavâs puõccu jueʹlj jie vuäl ruuv čõõđ pånna, vueʹzzest mainsteǩâni. Puõccui jååʹttemǩeäinid luõʹddjeei vuäjid rõõvvam puõccui lij täujja vaiggâd leʹbe vueiʹtʼtem piâssâd vuäjast meädda. Jeäʹrben vueʹzz hiâvvne lâuʹŋŋpuuʹtʼtemvuuʹdi vuäjid.

Lâuʹŋŋpuuʹtʼtõõzz plaaneeʹn ääʹššvuäzzlaž paalǥâskååʹdd mieʹldd åårrmõš lij vuõss-sâjjsa vääžnai projeeʹkt aalǥâst ääʹljeeʹl. Puõccuid šõõddi skääđaid âlgg põrggâd cõggâd tuejjeeʹl raampid nokk tääujâs. Måttmešt puuʹtʼtemvuuʹd äiddummuš vuäitt leeʹd še tarbbsõs. Äiddummuž taarbâst da vaikktõõzzin âlgg pâi saǥstõõllâd ääʹššvuäzzlaž paalǥâskooʹddin.

Lâuʹŋŋpuuʹtʼtemvuuʹdi mâʹŋŋâânnmõõžž ohjjeet kääʹvtummuž da jeeʹres mäddâânnmõõžž plaanummuž veäkka nuʹtt, što tõʹst ij šõõdd lââʹzz hääiʹt puäʒʒhoiddu. Lâuʹŋŋpuuʹtʼtõõzzâst jaukkâm vuuʹdid âlgg vuõss-sâjjsânji maaccted luâttvuâkka. Jeeʹres ââʹnnma valddum vuuʹdi ââʹnnmest ij vuäǯǯ šõddâd paalǥâskådda kuul leʹbe põõšši vuʹvddmõõntummuž. Lâuʹŋŋpuuʹtʼtemvuuʹdi mâʹŋŋâânnmõš mäddtäälljânnmen ij suåv puäʒʒhåiddvoudda, ko tõt vuäitči tuejjeed mååžnteʹmes äiddeemõõlǥtõõzzid da kuulid ääʹššvuäzzlaž paalǥâskådda.