Piõggviõkk

Piõggstroiʹttli vaikktõõzz puõccuid da puäʒʒhoiddu jeäʹt võl meeʹst Lääʹddjânnmest čuuʹt toobd. Olos piõggstroiʹttel lie maatkčemkõõskõõzzâst Muoniost da Jeänõõǥǥ Lammasoaivist lie tåʹlǩ kolmm uʹcc viõkkstroiʹttel. Tervola Varevaara stroiʹttel lie aivv väʹlddčuâǥǥas neellj paaldâst mâʹte še Simo maal, kook lie tuåimmjummšest. Määŋg piõggviõkkhaʹŋǩǩõõzz lie kuuitâǥ jeeʹres åʹrnn puäʒʒhåiddvuuʹd jorddmõššân da õõldâsiiʹjjin vuäǯǯap lââʹzz ǩiõččlâsttmõõžžid tõʹst, mäʹhtt puõccu siõhttlâʹtte viõkkstroiʹttlid.

Ruõccjânnmest tuejjuum GPS-vuåppâmtuʹtǩǩummuž da puõccui põšǩǩtuʹtǩǩummuš uʹvdde kuuitâǥ juʹn viittjõõzzid puõccui siõhttlõõttmest. Puõccu pâʹrǧǧe veäʹltted piõggviõkkvuuʹdid nuʹtt viõkkstroiʹttli raajjmõõžž ko tõi tuåimmjummuž poodd da lie jeäʹrben kueʹddem poodd lađđâz stamldõõzzid. Puõccui nälla leeʹd vaikkte kuuitâǥ määŋg tuejjeei, mâʹte vuuʹdest juʹn åårrai jeeʹres infrastruktuur leʹbe stamldõs, palggâm- leʹbe kuäivvamvuʹvddšlaajj da koʹrvveei kuäivvam- da palggâmvuuʹd.

Jeäʹrben palggâmjânnmi, leʹbe kueʹddemvuuʹdi, âânnmõš di puõccui jååʹttemǩeäin vuäiʹtte mottjed piõggstroiʹttli mieʹldd. Koʹst stroiʹttel lie kõskkvuõđâst puäʒʒjânnmid da tõi ââʹnnma, lij kõskksaž sââʹjest arvvtõõleeʹn stroiʹttli vaikktõõzzid. Piõggstrooiʹtelhaʹŋǩǩõõzzid lij-i mäinn taʹrǩstõõllâd pâi haʹŋǩǩõõzz mieʹldd. Haʹŋǩǩõsplaanummuž aalǥ rääʹjest âlgg seʹlvted, måkam vaikktõõzz možât lie da vueiʹtet-a tõid plaaneem veäkka ǩieʹppeed. Puõcci GPS-vuåppmõš ouddâl haʹŋǩǩõõzz, raajjâm poodd da viõkkstroiʹttli ââʹnnem poodd puätt õõldâspuõʹttivuõđâst miârkkteeinalla uʹvdded lââʹzz teâđ puõcci siõhttlõõttmest da puäʒʒpaaiʹǩi âânnmõõžž muttsin.

Eeʹjj 2014 looppâst Lääʹddjânnmest leʹjje ââʹnnmest 260 piõggstroiʹttled, kooi obbkapasiteʹtt lij 627 MW. Tõk puuʹtʼte nuʹtt 1,3 proseeʹnt Lääʹddjânnmest eeʹjj 2014 õnnum liâđǥâst. (Suomen tuulivoimayhdistys ry). Piõggkaardâshaʹŋǩǩõõzz lie vueʹss tuâjj- da jieʹllemvueʹǩǩministeria kuʹǩes äiʹǧǧkõõsk äimmõs- da energiastrategia. Tõn täävtõssân lij kaggâd piõggviõkk obbkapasiteʹtt 2500 megawattiiʹje ekka 2020 mõõneeʹst.

Puk puäʒʒhåiddvuuʹdest plaaneemnalla åårrai piõggviõkkhaʹŋǩǩõõzz jie kaiʹbbe pirrõsvaikktõõzzi arvvtõõllâm-mõõntõõllmõõžž. Uuʹccab mettkääʹv haʹŋǩǩõõzzid põõrǥât viikkâd čõõđ tåʹlǩ kääʹvvtummšin. Vaikktõõzzid puäʒʒhoiddu âlgg kuuitâǥ pâi arvvtõõllâd da väʹldded lokku haʹŋǩǩõsplaan aalǥ rääʹjest.

Puäʒʒhååid da luâđ peäʹlest uuʹccmõsân hääiʹt lij, jõs piõggstroiʹttel rääjj juʹn rajjum pirrõʹsse.