Jååttlõkskääđđarvvtõõlli

Jååttlõkskääđđarvvtõõlli lij paalǥâskååʹdd almmjallaš såbbar vaʹlljääm ooumaž, kååʹtt tuåimmai puäʒʒhåiddlääʹjj 51 § meâldlaž ååsktõõzzin.

Puäʒʒpäärtast iʹlmmtet jååttlõkskääđđarvvtõõllja juʹn-a vuõiʹǧǧest, pååʹles leʹbe puäʒʒeeʹžžed pääiʹǩ. Arvvtõõlli jeäll mââʹjeeǩâni šõddmõšpääiʹǩest taaʹrǩsteʹmmen iʹlmmtõõzz lammšõõvvâm puäccjest di väʹldd pââjas skääđ vueʹsspieʹli teâđaid, rääjj skääđđiʹlmmtõõzz da iʹlmmat šõddmõõžžâst ääʹššvuäzzlaž puäʒʒvuäʹmsteeja.

Päärtast lammšõõvvâm puõccu põõrǥât kaunnâd nuʹtt jåttlânji ko vueiʹtlvaž. Arvvtõõlli veekk kroopp meädda. Kroopp hiâvtummšest vääʹldet lokku pirrõsveʹrǧǧneeʹǩǩ raʹvvjõõzzid. Väʹlddvueʹzzest krooppid čiõkkât.

Jååttlõkååsktemkõõskõs koʹrvvad päärtast mõõntum puõccu. Puõcci koʹrvveemäärv meäʹrtâʹvve puäʒʒšlaaj meâldlânji kõskkteädd, kõskkmeärrsaž ǩilohââʹdd da šõõǥǥtemǩeeʹrd mieʹldd. Koʹrvveemäärvid meäʹrtõõlât juõʹǩǩ eeʹjj. Koʹrvvõõzz määuʹset paalǥâskådda, kååʹtt mähss tõn ooudâs päʹrttšõõvvâm puõccu vuäʹmsteeja.