Boazu materiálan

Duollji

Guolga- ja duolljedujiide dulljiid ja gápmasiid skáhppot njuovvama oktavuođas. Duollji dikšojuvvo geavahusa mielde. Árbevirolaččat bohcco gápmasiin gorrot goikkehiid, bittuid ja gistáid. Bohcco duoljis gorrojuvvojit beaskkat, sihke bargo- ja feastaatnui. Miesi duoljis sáhttá goarrut bivvalis gahpiriid. Bohcco gápmasiid ja duljiid sárgun ja dikšun lea dárkilis bargu ja juohke duojáris leat dasa iežas buorrin duođaštuvvon vuogit.

Stuorámus oassi duljiin vuvdojuvvo dán áigge njuovahagain dikšunlágádusaide. Doppe duljiin bargojuvvo čikŋaduoljit, sisti ja mohkkanáhkki. Suomas bohccoduljiid dikšunfitnodagat leat moadde.

Boazu lea šaddan bivnnuhis ja geasuheaddji materiálan maiddái olgoriikkain. Boazonáhki lea áidnalunddot ja luonddu dahkan dáidda, iige oktage náhkki leat seammalágan.

Ostetkeahtes náhkki

Varas buhtistuvvon duollji, mii lea navilduvvon dahje goikaduvvon. Navildeapmi lea duollji guohcageapmi čázis dahje muohttaga vuolde, man maŋŋá guolggat vulget álkit,

Duollji goikaduvvo nu, ahte duollji spiilejuvvo seaidnái goikat ja diktojuvvo goikat jagi badjel dahje máŋgage jagi. Ostetkeahtes náhki sáhttá geavahit ovdamearkan rumbbuin.

Ostejuvvon náhki, sisti

Sisti lea bohcconáhkki, man giksadanávnnasin lea geavahuvvon sieđga-, soahke-, suhpe- dahje leaibebárku. Ruovttus ostejuvvon sisti lea árbevirolaš duodjemateriála. Sisti geavahanvejolašvuođat leat máŋggat. Das leat árbevirolaččat gorron iešguđetlágan seahkaid, lávkkaid ja gárvvuid. Dat lea duođaid nana ja alla kvalitehta materiála, mii gierdá sohkabuolvvas nubbái

Dákti ja čoarvi

Bohccodákti ja čoarvi leat nana materiálat máŋggat atnudiŋgii. Boazu gahčaha čorvviidis jahkásaččat, de danin bohccočoarvi lea ekologalaš materiála. Čorvviid skáhppot Suomas jahkásaččat badjel 100 000 kilo.

Árbevirolaččat čoarvvis leat duddjon earret eará basttiid, niibedohpaid, nállogođiid, boaluid, geabaid, riskkuid ja máŋga eará árgabeaivve dávvira. Dáktediŋggat hervejuvvojit.

Dán áigge čoarvvis duddjojit maiddái design-čiŋaid. Čoarvvi sáhttá ovttastit eará materiálain dego muorain dahje metállain.

Bohcco gaccain barget iešguđetlágan čiŋaid. Daidda ožžot čáppa hámi saddjemiin.