Bohcco jahki – čuovgga ja skápma

Boazodoalloguovlu ollá Mearrabađa rittus Kainuu várreguovlluid bokte álo davimus Sámi duoddariidda. Luonddudilit molsašuddet ollu viiddes guovllu sierra beliin. Máttimus boazodoalloguovllus lea juo geassegoahtán, go davvin lea vel mehter muohta ja jávrrit jieŋas.

Geassi ja čakča leat bohccuide šaddama áigi. Ruonábiepmuin ja čavčča guobbariin bohcco buoidu ja oažžu buoiddi dálvvi várás. Geasi áigge bohcco deaddu lassána, boazu molsu guolgga ja sihke njiŋŋálasaide ja varrásiidda šaddet ođđa čoarvvit. Njamaheaddji áldui geassi lea goittotge lossa áigi. Álddu deaddu sáhttá álgogeasi áigge uhccut dušše mielkebuvttadeami dagahan energiijaváilli dihte.

Davvin boazu lea áidna luonddus ealli smirezasti, mii birge birra jagi jalges duoddariin. Boazu gávdná heivvolaš borramuša sihke geasi ruonááigodagas ja dálvvi garra dilis. Bohcco borramuš ja biebmosuddadeami doaibman molsašuddet fuomášahtti ollu geasset ja dálvet.

Jeahkális lea ollu álkit suddi karbohydráhtat

Dálvet boazu čiegarda borramuša assás obbasa vuolde. Dálvvi birgema dihte bohcco vuohki geavahit jeahkála borramuššan lea elliidmáilmmis erenoamáš. Jeagelborramuš sihkkarastá bohccui iežas “ekoleađmma”, mas borramušgilvvohallan eará šlájain ii leat. Boazu nuppástuhttá jeagil- ja ruonáborramuša alladássásaš biergo-, náhke- ja dáktebuvttan ja doallá Lappi ássojuvvon.

Bohcco eallin álgá miesi riegádeames giđđat, miesse- dahje geassemánus. Boares dajahusa mielde: “válborin miessi cuoŋu alde” dárkkuha guoddima álgit cuoŋo- ja miessemánu jorggáldagas. Guottehat sáhttá joatkašuvvat guhkás geassemánu beallái.