Guođoheapmi ja boraheapmi

Dálvet bohccuid guođohit mohtorgielkkáiguin, vai dat bissot sávahahtti guohtuneatnamiin ja vai spiriid dagahan vahágiid sáhttet unnidit. Seammás čuvvot bohccuid vuoimmi ja spiriid lihkadeami ealus ja dan lahkosis.

Oassi boazoeaiggádiin váldet iežaset bohccuid áiddiide dálvemánotbajiide. Dát álkidahttá bohccuid doallama ealus ja suojis spiriin, muhto lasiha nuppi dáfus fuomášahti ollu boraheami dárbbu.

Bohccuid bibmet dálvet dárbbu mielde olles boazodoalloguovllus. Buorre guohtuneatnamiin ja buorre dilis biebmama ii vealttakeahttá dárbbaš. Meahccedoaloguovlluin bohccuid lassebiebman dálvet lea leamaš juo guhkká vealtameahttun, daningo luondduborramuš ii boares vuvddiid čuohpaheami dihte leat oažžumis. Biebmamiin bohccuid dollet buorre ortnegis ja dat buvttadit buorre, eallinfámolaš misiid. Biebmama ánssu dihte Suomas eai jáme bohccot nealgái mássaid mielde, vaikko luondu geahččalivččiige.

Oasis bálgosiin guođohit bohccuid árbevirolaš vuogi mielde mohtorgielkkáiguin ja beatnagiiguin. Bearrašat, sogat ja gilit sáhttet ráhkadit siiddaid, mat guođohit bohccuideaset ovttas.

1960-logus álgán mohtorgielkká geavaheapmi rievdadii boazodoalu ollu. Ovdal siiddaid guođohedje čuoigga. Go guođohedje čuoigga, de badjeolmmoš galggai bissut olles áigge siiddas. Mohtorgielkká ánssus badjeolmmoš sáhttá dán áigge vuodjit dávjá idjii ruoktot ja dárbbašettiin oažžu bohccuid jođánit johttit ja sirdit daid báikkis nubbái. Dáláteknologiijain bohccuin oažžut maid báikedieđuid GSM/GPS -báttiin: moadde báddebohcco addet dieđuid ealu sajádagas ja lihkademiin.

Mohtorfievrrut lea beavttálmahttán boazodoalu, muhto maid lasihan goasttádusaid. Dálá boazodoallu leage dássedeattu gávdnan beaktilvuođagáibádusaid ja gánnihahttivuođa gaskkas.